Book Review: Ang Kapangyarihang Higit Sa Ating Lahat ni Ronaldo S. Vivo Jr.

Book Review: “Ang Kapangyarihang Higit Sa Ating Lahat”
ni Ronaldo S. Vivo Jr.

Unang Nobela ng kuwentistang si Ronaldo S. Vivo Jr. Ang “Ang Kapangyarihang Higit Sa Ating Lahat” ay isang nobela na binuo ng pinagtagni-tagning masasalimuot na kuwento ng magkakaibigang Dodong, Buldan at Butsok. Patayan, droga, tirahan, gaguhan at marami pang iba. Hindi normal ang istilong ginamit sa pagsusulat, alam ni Vivo kung kailan niya maaaring laruin ang takbo ng istorya kaya naman napakahirap ibaba ng librong ito kahit ihing ihi ka na habang nakayukyok sa isang tabi at ninanamnam ang bawat eksena.

Isang beses akong napamura dahil may isang eksena na mas gugustuhin ko pang maglinis ng nagkalat na bituka ng tao sa kalsada nang padakot na walang guwantes; kaysa sapitin yung inabot ng isang karakter sa kamay ng mga putarages. Pero gaya ng sinabi ko kanina, bilang manunulat ay mahusay maglaro itong si Vivo.

Hindi ako naligaw habang binabasa ko ang libro. Hindi lang isang beses akong nakapagbasa ng ganitong istilo ng pagsusulat pero ‘di tulad ng kadalasan, hindi ko kinailangang bumalik nang ilang kabanata para maintindihan ang takbo ng napakawasak na nobelang ito. Napakagandang babasahin. At nanawagan ako sa mga mambabasa na matagal nang nagnanais na maantig ang mga puso, mapamura sa galit, at bumaligtad ang mga tarpilya. Basahin niyo ang nobelang ito ni Ronaldo S. Vivo Jr. At iba pang limbag ng mga kapatid natin sa Ungas Press.

Isang humahalipawpaw na LIMANG BITUIN para sa’yo VIVO! Mabuhay ka!

Rating: 5 of 5 Stars

-JB